Archive for the 'Allment' Category

Statkraft trekkjer konsesjonssøknaden om overføring av vestsideelvane og heving av Tunsbergdalsdammen. Det går fram av ei pressemelding selskapet sende ut i dag.

Konsesjonssøknaden ligg i NVE, som har varsla sluttsynfaring 14. august. Det var venta at NVE ville gje si tilråding til Olje- og energidepartementet i løpet av året.

Statkraft presiserer at konsesjonssøknaden om bygging av Vigdøla kraftverk står ved lag. NVE si varsla synfaring av Vigdøla 15. august må ein såleis rekne med at går som planlagd.

Me er glade for at Statkraft sjølv set ein sluttstrek for vestsideutbygginga, men vil framleis arbeide for at Vigdøla kraftverk ikkje får konsesjon.

Statkraft grunngjev skrinlegginga slik:

Høye anleggskostnader kombinert med forventet høye fall- og grunnerstatninger har svekket lønnsomheten i prosjektet og Statkraft velger derfor å trekke konsesjonssøknaden.

Statkraft har heile vegen lagt vekt på at det er ei marginal lønsemd i prosjektet og har sjølv sagt at det var grøne sertifikat-ordninga som berga prosjektet frå skrinlegging for eit par år sidan.

Ein kan likevel undre seg noko over at «forventet høye fall- og grunneieerstatninger har svekket lønnsomheten i prosjektet». Erstatningsnivået etter gjeldande rettspraksis burde ikkje kome som ei overrasking på selskapet. Dei grunneigarane som ynskte ei utbygging og har tinga med Statkraft om erstatningar, bør såleis ikkje kjenne noko ansvar for skrinlegginga.

Luster kommune har i dag oversendt høyringsfråsegna si til NVE. Her er dei tre dokumenta samla i eitt (pdf). Vedtaket i kommunestyret er sjølvsagt det viktigaste, men ein skal merke seg at det kviler på og vert utdjupa av rådmannen si saksutgreiing.

Sogn Avis om møtet.

47 ungdomar frå Jostedalen, Leirdalen og Vigdalen har sendt eit brev til Luster kommune der dei seier nei til meir kraftutbygging. Brevet står òg i Sogn Avis i dag og var sak på NRK Sogn og Fjordane i dag tidleg. Det lyder slik:

(Talet og namnelista blir oppdatert etter kvart som det måtte kome til fleire. Då innlegget vart sendt til Sogn Avis var det 40, og då brevet gjekk til kommunen var det 45.)

Nok kraftutbygging i Jostedalen

Me er oppvaksne i Jostedalen, Leirdalen og Vigdalen og under 30 år. Me håpar kommunestyret, NVE og regjeringa seier nei til dei nye kraftutbyggingsplanane. Dei tidlegare store kraftutbyggingane i Leirdalen og Jostedalen har ført mykje godt med seg, men har òg gjort at me har att få frittrennande elvar. Området på vestsida frå Myklemyr til Krundalen er det siste større urørte tur- og friluftsområdet nær busetnaden i Jostedalen. Utbygginga til Statkraft vil føre til at det mest ikkje blir vatn att i desse elvane. Me håpar dette området kan takast vare på for dei kommande generasjonane og for reiselivet i bygda.

Underskrive:

Andrea Berget, Kari Hilde Bergseth, Karine Blikra, Stine Blikra, Aleksander Brun, Jeanette Aaland Brun, Lasse Brun, Malin Aaland Brun, Preben Brun, Ingeborg Hess Elgersma, Hylkje Hess Elgersma, Anders Olav Ese, Britt Kristin Ese, Mari Ese, Heidrun Fossøy, Anne Gjerde, Marthe Gjerde, Atle Grov, Erik Grov, Gaute Grov, Johanne Grov, Torgeir Grov, Laila Kjærvik, Silje Kreken, Evy Kristin Krokgjelet, Siv Janne Krokgjelet, Britt Kronen, Kristin Kronen, Hilde Kveane, Marthe Kveane, Anne Judith Leirdal, Camilla Therese Leirdal, Linn Christina Leirdal, Oddny Julie Leirdal, Helge Norberg, Nina Norberg, Eli Johanne Ormberg, Eli Ruud, Mathilde Skjæret, Sjur Skjæret, Anne Marte Snøtun, Oddvar Vigdal, Ole Henrik Vigdal, Gunni Yttri, Ingvild Yttri, Anita Aasen og Merete Aasen

Tilhengarane av vestsideutbygginga har kome meir på banen etter at formannskapet sa nei sist onsdag. Laurdag var det eit større oppslag i Sogn Avis med ein del grunneigarar som ønskjer utbygging, og det har stått fleire innlegg dei siste dagane. Me gjentek at me tykkjer det er viktig og bra for debatten at fleire synspunkt kjem fram. Lista over medieoppslag er no oppdatert. Det har også kome nokre direkte åtak på aksjonsnemnda, og dei har me så langt svara dette på.

Statkraft brukar dagens Sogn Avis til å argumentere for at den avtala både fleirtalet og mindretalet i formannskapet sa nei til, er god. Det får vise seg om dette frå nokon til å skifte meining. Me viser elles til det me har skrive før når det gjeld Statkraft sine opplysningar om grunneigarerstatningar og flaumdemping.

Ingar Norberg har sendt oss eit spørsmål på facebook, e-post og i innlegg i Sogn Avis (sjå nedanfor). Her er svaret vårt: Continue reading «Svar på spørsmål om aksjonen»